قصيدة اثوابك من ثلج ياطائفي اتموع

(((اثوابك من ثلج ياطائفي اتموع)))

بجينه او نزلت اعله اوراقنه ادموع

او كتبت بالحزن هاي القصيده

مابين الالم والعوز والجوع

الف هنياله كلمن يحفظ ايده

ابوجه شارعنه شفنه الموت مطبوع

وانياب الرصاص احفرت جيده

او صاروخ ابمجان الورد مزروع

اشكثر يكتل بشر هاي التفيده

ابصوانينه بعد ما ضلت اشموع

ولا فرحة طفل مصباح عيده

عدنه امن القتل انواع مو نوع

وانت اختار يانوع التريده

قتل تفجير جثه أو راس مكطوع

مامش غيرهه ابحلك الجريده

اللبلبل عاف عشه ابين الفروع

يخاف القاذفه تخطه او تصيده

نسينه احنه الخميس او علم مرفوع

او نسينه اطفالنه الحفضت نشيده

(عش هكذا في علو)صفت ممنوع

او غدت جلماتهه كلش بعيده

شنو ذنب الطفل مو بعده راضوع

بين احضان امه ايصب وريده

ابصدرنه المحترك ما ضلت اضلوع

حمت واثرت باطرافه الحديده

اثوابك من ثلج ياطائفي اتموع

او عدنه اثواب ما تعتك جديده

مالح بعده للخطار عشنه

ولو بين الالم والعوز عشنه

يظل بس للبلابل ملك عشنه

اوحرام البوم يكعد حدر فيه

القصيدة للشاعر: الدكتور فلاح الزيدي

شكرا قناص القلوب لهذه المشاركه الجميله
اكيد ان شاء الله محد يكدر يفرقنه لا طائفي ولا غيره
المهم نبقه عراقيين ايد وحده وقلب واحد

اكيد ما دامنه نعرف الاعيبهم
وان شاء الله نبقه ايد وحده
ومحد يكدر يقرقنه انت بس كول يا الله
شكرا لمرورك الجميل
يا عراقي يا اصيل

قصيدة جميلة جداً عاشت ايدك قناص القلوب

ننتظر منك الافضل على طول

اكيد راح احاول اقدم الافضل ما دام بنت الرافدين تشجعني
بس للامانه مو اني الشاعر
نورتي بنوته

» قصيدة (أمي) - للشاعر غانم الفياض
» قصيدة صبرا يا وطن - للشاعر زياد البصراوي